Հաստատվեցին «Ինժեներական» և «Խելացի» քաղաքներ ստեղծելու մասին որոշումները

Այսօր կառավարության նիստում տնտեսական զարգացման նախարար Սուրեն Կարայանը ներկայացրեց «Ինժեներական քաղաք» ստեղծելու մասին հայեցակարգը և դրանից բխող միջոցառումների իրականացման ժամանակացույցը:

Ըստ նախարարի` «ինժեներական քաղաք» ծրագրի նպատակն է Հայաստանը դարձնել ինժեներական և բարձր տեխնոլոգիական ծառայություններ արտահանող երկիր: Ծրագիրը կստեղծվի Բագրևանդի փողոցում` 3 հեկտար տարածքի վրա, պետություն-մասնավոր հատված համագործակցության շնորհիվ` 21,2 միլիոն դոլարի ներդրումով:

Որոշումը հաստատվեց:

Մեկ այլ որոշմամբ` կառավարությունը հաստատեց «Խելացի քաղաք» ստեղծելու մասին նախագիծը, որով սահմանվում են «Խելացի քաղաք» ստեղծելու տեսլականը, զարգացման սկզբունքները, ուղղությունները, ակնկալվող արդյունքները: «Խելացի քաղաք»-ը, ըստ որոշման նախագծի, մշտապես զարգացող քաղաքային բնակավայր է, որտեղ կիրառվում են ժամանակակից տեխնոլոգիական մոտեցումները քաղաքացիների և քաղաքի հյուրերի անվտանգ ու հարմարավետ կյանքի պայմանների ապահովման համար: