Կարո Փայլանը արձագանքել է մանկահասակ թուրք աղջկան զոհելու՝ Էրդողանի առաջարկին

Թուրքիայի քրդամետ Ժողովուրդների դեմոկրատական կուսակցության հայ պատգամավոր Կարո Փայլանը դատապարտել է Թուրքիայի նախագահ Ռեջեփ Թայիփ Էրդողանի այն հայտարարությունը, որում նա պատրաստակամություն էր հայտնել «հանուն հայրենիքի» մանկահասակ աղջկա զոհ տալ: Այս հայտարարությանը հաջորդել էին հավաքվածների ծափահարությունները:

«Ինչպիսի անխղճություն է։ Բա ծափե՞րը։ Շարունակեք շարժվել դեպի «երջանիկ խելագարություն»»,- ֆեյսբուքյան իր էջում գրել է Փայլանը։

Հիշեցնենք, որ իր կուսակցության ժողովի ժամանակ Էրդողանն անդրադարձել էր ռազմական գործողություններին, ապա բեմ էր հրավիրել կարմիր բերետով` լացակումած մի մանկահասակ աղջկա և  ասել. «Կարմիր բերետավորները չեն լացում։  Եթե այս աղջիկն էլ զոհվի կռիվներում,  նրան կփաթաթենք  մեր դրոշի մեջ։ Աղջի'կս, դու ամեն ինչի պատրաստ ես, այնպես չէ՞»։