Կայացել է հայ-իրանական hամատեղ կոմիտեի անդրանիկ նիստը

«Հայաստանի Հանրապետության կրթության և գիտության նախարարության և Իրանի Իսլամական Հանրապետության գիտության, հետազոտությունների և տեխնոլոգիաների նախարարության միջև գիտության, հետազոտությունների և տեխնոլոգիաների ոլորտներում համագործակցության մասին» փոխըմբռնման հուշագրի շրջանակում Թեհրանում տեղի է ունեցել հայ-իրանական hամատեղ կոմիտեի անդրանիկ նիստը, որը գլխավորել են ՀՀ ԿԳ նախարարի տեղակալ Վահրամ Մկրտչյանը և ԻԻՀ միջազգային գործերում գիտության նախարարի տեղակալ Հուսեին Սալար Ամոլին:

Նիստի ընթացքում քննարկվել են երկու պետությունների միջև գիտության, հետազոտությունների և նանոտեխնոլոգիաների ոլորտներում համատեղ նախագծերի իրականացման հնարավորությունները, միջբուհական, գիտական կազմակերպությունների, հետազոտական հաստատությունների միջև համագործակցության ուղիները: Իրանական կողմը ներկայացրել է Ուրմիա համալսարանը՝ որպես գիտության բնագավառում համագործակցության աշխատանքները համակարգող ազգային կենտրոն:

Միաժամանակ, քննարկվել են ուսումնական հաստատությունների ավարտական վկայականների փոխճանաչման, ուսանողների, դասախոսական անձնակազմի, գիտնականների և փորձագետների փոխանակման, այդ թվում՝ կարճաժամկետ ծրագրերի իրականացմամբ, ինչպես նաև փոխադարձ այցելությունների և համատեղ գիտական համաժողովների կազմակերպման հարցերը:

ՀՀ պատվիրակությունը հանդիպում է ունեցել նաև ԻԻՀ կրթության նախարարի տեղակալ Մոջտաբա Շարիաթի Նիասարի հետ, որի ընթացքում երկու կողմերն իրենց պատրաստակամությունն են հայտնել ամրապնդելու և ընդլայնելու համագործակցությունը կրթության ոլորտում:

ՀՀ ԿԳՆ