Կոչ ենք անում մասնակցել թանկացումների դեմ երթին, ոչ թե բողոքել «Ֆեյսբուք»-ում կամ տանը` բազմոցին նստած. Արարատ Միրզոյան

ԱԺ հայտարարությունների ժամին «Ելք» խմբակցության պատգամավոր Արարատ Միրզոյանն անդրադարձավ հարկային օրենսգրքին, որի փոփոխությունից հետո գնաճ արձանագրվեց, և այդ թանկացումները հունվարի 1-ից զգացին քաղաքացիները` իրենց բյուջեի վրա:

«Ակցիզային հարկի բարձրացումից հետո բարձրացան վառելիքի գները, որն էլ հանգեցնելու է շղթայական նորանոր թանկացումների: Սրան զուգահեռ` բնակչության եկամուտները ոչ միայն չեն աճել, թոշակ ու աշխատավարձ ոչ միայն չեն բարձացել, այլ որոշակի խավի մոտ եկամուտները նվազել են՝ եկամտահարկի փոփոխութամբ պայմանավորված»,- ասաց նա:

Պատգամավորը նշեց, որ «Ելք»-ը խոսել է ժամանակին այդ մասին: Ըստ նրա` անկախ նրանից` ում են ձայն տվել խորհրդարանական ընտրություններին, կոչ են անում մասնակցել թանկացումների դեմ երթին: «Բողոքեք ոչ թե «Ֆեյսբուք»-ում, տանը` բազմոցին նստած, շրջապատում, այլ փողոցում`մասնակցելով «Ելք»-ի` հունվարի 19-ին հրավիրած երթին, «Մոսկվա» կինոթատրոնի հրապարակում»,- ասաց նա: