ՀՃՇԱՀ-ում տոնածառի տակ հայտնաբերված կասկածելի իրի պատճառով ուսանողներին տարհանել են

Ճարտարապետության և շինարարության Հայաստանի ազգային համալսարանի շենքում գտնվող տոնածառի տակ կասկածելի արկղ է հայտնաբերվել: Հնչել է տագնապ, և ուսանողները տարհանվել են:

Yerkir.am-ի հետ զրույցում Հայաստանի ազգային պոլիտեխնիկական համալսարանի ռեկտոր Ոստանիկ Մարուխյանը հայտնեց, որ թեև կասկածելի իրը հայտնաբերել են ճարտարապետաշինարարականում, սակայն իրենց՝ այդ մասնաշենքում /երկրորդ/ գտնվող ուսանողներին նույնպես տարհանել են: «Մյուս մասնաշենքերում դասերն ընթանում են իրենց հունով»,- ասաց նա: 

Ուսանողներից մեկը մեզ հայտնեց, որ դասի ժամանակ տագնապի ազդանշան է հնչել, և իրենք լքել են լսարանը:

Ոստիկանությունից էլ մեզ տեղեկացրեցին, որ այս պահին դեպքի վայրում աշխատում է ոստիկանության օպերատիվ խումբը: