Ամանորից առաջ ապրանքների գների անհիմն բարձրացման ռիսկեր կան. վարչապետը հանձնարարեց խստացնել վերահսկողությունը

ՀՀ վարչապետ Կարեն Կարապետյանը կառավարության այսօրվա նիստում անդրադարձավ Ամանորին ընդառաջ շուկաներում վերահսկողության խստացմանը։ «Ամանորյա տոների շրջանում տնտեսական կտրուկ ակտիվությունից մի քանի անգամ ավելանում է սպառողական ապրանքների պահանջարկը, նշվածը պարունակում է ապրանքների գների անհիմն բարձրացման որոշակի ռիսկեր»,-ասաց վարչապետը:

«Հաշվի առնելով այդ հանգամանքը, ինչպես նաև հանրության շրջանում առկա մտահոգությունները` առաջարկում եմ ՏՄՊՊՀ նախագահին` Ամանորին ընդառաջ խստացնել վերահսկումը գերիշխող ապրանքային շուկաներում՝ գների անհիմն բարձրացումների, հակամրցակցային գործողությունների կանխարգելման նպատակով, ինչպես նաև իրականացնել ամենօրյա մոնիթորինգ՝ շուկայում կատարվող գնային փոփոխություններին օպերատիվ կերպով տեղեկանալու և հնարավոր խնդիրների դեպքում գործուն միջոցներ կիրառելու համար»,- նշեց Կարեն Կարապետյանը: