Համազգայինի տնօրենի համար մրցույթ է հայտարարվել. Չալդրանյանը՝ թատրոնի տնօրենի թեկնածու

Սոս Սարգսյանի անվան համազգային թատրոնի տնօրենի թափուր պաշտոնի համար հայտարարվել է մրցույթ: Այն կկայանա դեկտեմբերի 22-ին։

Yerkir.am-ի տեղեկություններով՝ տնօրենի պաշտոնի համար հայտ է ներկայացրել դեռևս միայն թատրոնի գեղարվեստական ղեկավար Վիգեն Չալդրանյանը:

Հիշեցնենք, որ ուշագրավ փոփոխություններ տեղի ունեցան թատերական ոլորտում՝ Համազգայինի գեղարվեստական ղեկավար նշանակվեց Վիգեն Չալդրանյանը, իսկ Համազգայինի տնօրենը՝ Վարդան Մկրտչյանը, նշանակվեց Գ. Սունդուկյանի անվան ազգային ակադեմիական թատրոնի տնօրեն: Վերջերս էլ Չալդրանյանն ընտրվեց Հայկական ազգային կինոակադեմիայի նախագահ:

Դեռ 2016-ին, երբ Չալդրանյանը նշանակվեց Համազգայինի գեղարվեստական ղեկավար, լուրեր էին շրջանառվում, որ հենց նա էլ հետագայում կղեկավարի թատրոնը՝ արդեն իսկ տնօրենի կարգավիճակով: Սակայն վերջերս Չալդրանյանի՝ Կինոակադեմիայի նախագահի պաշտոնը ստանձնելուց հետո, կարծես, անորոշ էր, թե ով կստանձնի թատրոնի տնօրենի պաշտոնը, բայց, ինչպես պարզվում է, Չալդրանյանը կփորձի համատեղել աշխատանքը: