Զորակցում ենք նախագահ Աունի նախաձեռնությանը. Հակոբ Բագրատունի

Աղբյուրը՝ aztagdaily.com

Հանրապետութեան նախագահ զօր. Միշել Աունի հրաւիրած քաղաքական խորհրդակցութիւններու շրջագիծին մէջ, ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի երէկ այցելեց նախագահական պալատ:

Նախագահ Աունի հետ հանդիպելէ ետք, Յ. Բագրատունի շեշտեց, որ ՀՅԴ Լիբանանի Կեդրոնական կոմիտէն կը զօրակցի նախագահ Աունի նախաձեռնութեան, որուն նպատակն է երկրին քաղաքական աշխատանքը հունի մէջ դնել:

«Մաղթեցինք, որ նախագահ Աուն այդ նախաձեռնութեան կառչած մնայ` մինչեւ տագնապին լուծումը», ընդգծեց ան:

Երեսփոխան Բագրատունի յոյս յայտնեց նաեւ, որ վարչապետ Սաատ Հարիրի կառավարութիւնը կը հրաւիրէ նիստի եւ իր աշխատանքները կը շարունակէ մինչեւ երեսփոխանական ընտրութիւններու կայացումը` ըստ նախարարաց խորհուրդի աշխատանքային ծրագիրին եւ նախագահական համաձայնութեան:

Եարզէի Մէջ

Յ. Բագրատունի այցելեց նաեւ Եարզէ, ուր հանդիպում մը ունեցաւ բանակի հրամանատար զօր. Ժոզեֆ Աունի հետ:

Հանդիպումին ընթացքին քննարկուեցաւ երկրին ապահովութեան կացութիւնը` շեշտելով կայունութիւնը պահպանելու կարեւորութիւնը:

Ապպաս Իպրահիմի Մօտ

Երեսփոխան Բագրատունի հանդիպում մը ունեցաւ նաեւ Ընդհանուր ապահովութեան ուժերու ընդհանուր տնօրէն հազարապետ-զօրավար Ապպաս Իպրահիմի հետ:

Քննարկուեցան Լիբանանի ապահովական իրավիճակին վերաբերող հարցեր, ինչպէս նաեւ իրաքահայ եւ սուրիահայ տեղահանուածներուն կապուած խնդիրներ: