Նիստի ամենամեծ ձեռքբերումը կլինի ԵՏՄ շուկաներում հայկական ապրանքների ազատ տեղաշարժի հնարավորությունը. ԵՏՀ նախարար

«Մուլտի Գրանդ հոթել» հյուրանոցային համալիրում մեկնարկել են Եվրասիական միջկառավարական խորհրդի՝ նեղ և ընդլայնված կազմով նիստերը:

Լրագրողների հետ զրույցում ԵՏՀ նախարար Կարինե Մինասյանն անդրադարձավ օրակարգի ամենագլխավոր հարցերից մեկին` տրանսպորտային ոլորտի փաստաթղթերի թվայնացմանը: Նրա խոսքով` թվայնացման օրակարգի համար նախանշվել են մի քանի ուղղություններ, այն է` թվայնացման վերահսկողություն, թվային տրանսպորտային միջանցքներ, թվային առևտուր, տվյալների ստացման մշակում: Թվայնացումը նպաստելու է ոչ լեգիտիմ ապրանքաշրջանառության նվազեցմանը, կնպաստի հավասար մրցակցությանը և ծախսերի կրճատմանը:

Նիստում խոսվել է այն մասին, որ պետք է համապատասխանեցվեն ԵՏՄ անդամ երկրների օրենսդրությունները և համաձայնագրերը` թվային օրակարգին անցնելու համար: Հաստատվել է ճանապարհային քարտեզը ներքին շուկայում արգելքները վերացնելու վերաբերյալ, ֆիքսվել է ոսկյա զարդերի հարգադրոշմման փոխճանաչման հարցը, որը դեռ պետք է հաստատվի ԵՏՄ երկրների կողմից: Բազմաթիվ հարցեր են քննարկվել ապրանքների տրանզիտ փոխադրման տեխնիկական կարգավորման վերաբերյալ:

«Ամենամեծ ձեռքբերումը Հայաստանի համար ԵՏՄ շուկաներում հայկական ապրանքների ազատ շարժի հնարավորությունը կլինի»,- ասաց Կարինե Մինասյանը: