Շատ քիչ ուսուցիչներ կմնան առանց աշխատանքի. 13 դպրոց կվերակազմակերպվի

13 դպրոց այս տարի կվերակազմավորվի, ինչը նշանակում է, որ այդ դպրոցները կփակվեն. այսօր լրագրողներին հայտնեց ՀՀ ԿԳՆ հանրակրթության վարչության պետ Աշոտ Արշակյանը:

Նա նշեց նաև, որ դպրոցների վերակազմավորման պատճառն աշակերտների թվի նվազումն է, իսկ նպատակը` ուսուցման որակի բարձրացումը:

Ինչ վերաբերում է հարցին, թե քանի մանկավարժ կմնա առանց աշխատանքի, ապա կոնկրետ թիվ Արշակյանը չնշեց` պարզաբանելով, որ այժմ փորձում են փակվող դպրոցների ուսուցիչներին տեղավորել աշխատանքի այլ դպրոցներում: «Կարող եմ ասել միայն, որ շատ քիչ ուսուցիչներ կմնան առանց աշխատանքի, քանի որ դպրոցների միավորման արդյունքում, պարզ է, չէ՞, որ աշխատատեղեր էլ կստեղծվեն: Բացի այդ` մի շարք ուսուցիչներ աշխատում են համատեղության կարգով, այսինքն` նրանք նույնպես առանց աշխատանքի չեն մնա»,- ասաց նա:

Հարցին, թե կա՞, արդյոք, օրենք կամ պայմանագիր, որ փակվող դպրոցների տարածքը պետք է օգտագործվի միայն կրթության կարիքների համար, այլ ոչ թե դառնա հյուրանոց կամ այլ բան, Արշակյանը պատասխանեց` այո, դա օրենքի պահանջ է: «Փակվող դպրոցների շենքերը միայն ու միայն կրթության ոլորտին են ծառայելու, ինչն ամրագրված է նաև օրենքով»,- ասաց նա: