Արդյո՞ք Թուրքիայում որպես թշնամի չեն ընկալվի․ Շվեյցարիան զգուշացրել է իր քաղաքացիներին

Շվեյցարիայի ԱԳ նախարարությունը Թուրքիա մեկնել ցանկացող իր քաղաքացիներին ուղղված նոր զգուշացում է հրապարակել:

Ըստ Posta-ի՝ ԱԳ նախարարության տարածած հայտարարության մեջ, մասնավորապես, նշվել է, որ Թուրքիա մեկնել ցանկացողները, պետք է լավ մտածեն, թե արդյո՞ք Թուրքիայում որպես թշնամի չեն ընկալվի:

Նախարարությունը նաև հիշեցրել է Թուրքիայում մինչ օրս շարունակվող արտակարգ դրության մասին։ Հայտարարության մեջ  նշվել է նաև, որ Թուրքիայի և Շվեյցարիայի երկքաղաքացիություն ունեցող անձանց տվյալ պարագայում ավելի մեծ վտանգ կարող է սպառնալ: Այդ մոտեցումը նախարարությունը բացատրել է նրանով, որ Թուրքիան կարող է անտեսել երկքաղաքացիություն ունեցող անձանց՝ Շվեյցարիայի քաղաքացի լինելու հանգամանքը, ինչի հետևանքով Շվեյցարիայի հյուպատոսարանները հնարավորություն չեն ունենա որևէ կերպ պաշտպանել նրանց: