Գյուղի ջրատարից տղամարդու մասնատված դի է հայտնաբերվել

Արարատի մարզի Արևշատ գյուղի ջրատարից տղամարդու մասնատված դի է հայտնաբերվել: Այս մասին Yerkir.am-ին հայտնեց Արևշատի համայնքապետ Գոգոլ Նիկոլյանը:

«Դին նկատել են բնակիչները ու դիմել իրավապահներին: Մարմնի կեսը կա, կեսը չկա, տղամարդու մարմին է: Ջրատարը տրաքել է, խողովակներից դուրս է եկել մարմնի մի մասը»,- տեղեկացրեց համայնքապետը, ապա նշեց, որ  գիտի՝ իրենց համայնքի բնակիչ չէ:

Ոստիկանության լրատվական բաժնից էլ Yerkir.am-ի հետ զրույցում հայտնեցին, որ ոստիկանությունը նման ահազանգ ստացել է հուլիսի 13-ին՝ ժամը 19:30-ին:

«Ահազանգ է ստացվել, որ Արևշատի ջրատարի մոտակայքում հայտնաբերել են մարդու մարմնի գոտկատեղից ներքևի հատված: Դեպքի վայր է մեկնել օպերատիվ խումբ: Գյուղի ջրատար խողովակների մոտ՝ դաշտերի մեջ հայտնաբերվել է տղամարդու գոտկատեղից ներքևի հատված»,- ասացին ոստիկանությունից:

Հանգամանքները պարզվում են, կատարվում է նախաքննություն: