Թուրքիայի ԱԳՆ ներկայացուցիչներն այցելել են հայկական եկեղեցի՝ քննարկելու Աթեշյանի հարցը

Թուրքիայի ԱԳ փոխնախարար Քաան Էսենլերն ու ԱԳ նախարարության՝ հետազոտությունների հարցով օգնական Մուսթաֆա Օզջանն այցելել են Պոլսի հայկական Սուրբ Աստվածածին եկեղեցի:

Ըստ «Ակօս»-ի՝ եկեղեցու հիմնադրամի նախագահ Իսկենդեր Շահինգյոզը, կրոնական հարցերով պատասխանտու Զաքար Հոպարն ու մի շարք աշխատակիցներ եկեղեցու պատմությունը ներկայացրել են պետական հյուրերին: Այցից հետո հիմնադրամի ներկայացուցիչները կարճ առանձնազրույց են ունեցել պատվիրակության հետ:

Հանդիպման մասին հայտարարությամբ հանդես եկած Շահինգյոզը նշել է, որ ԱԳ նախարարության պատվիրակության հետ զրուցել են հայ համայնքի խնդիրների մասին:

«Առաջին հերթին նրանց ասացինք, որ հիմնադրամի նախագահի և պատրիարքի աթոռը դատարկ է: Նրանք հատիկ առ հատիկ արձանագրեցին մեր խնդիրներն ու հայտնեցին, որ կզբաղվեն դրանցով»,- նշել է հիմնադրամի նախագահը: