Հողմաղացների դեմ պայքարելն անիմաստ է. ՌԴ-ում Հայաստանի նորանշանակ դեսպանը` ադրբեջանական լոբբիզմի մասին

Հայ-ադրբեջանական հարաբերություններում ոչ թե պետք է նստենք ու Ադրբեջանի լոբբիզմի վերլուծությամբ զբաղվենք, այլ սեփական լոբբիզմն առաջ տանենք. լրագրողների հետ հանդիպման ժամանակ կարծիք հայտնեց ՌԴ-ում Հայաստանի արտակարգ և լիազոր դեսպան Վարդան Տողանյանը:

Ըստ նրա` Ադրբեջանն առատորեն օգտվում է բոլոր այն հնարավորություններից, որոնք թույլ են տալիս նրան իր լոբբիզմն ընդլայնել միջազգային տիրույթում, սակայն մենք էլ  պետք է փորձենք մեր երկրի շահերը պաշտպանել:

«Միջպետական հարաբերություններում լոբբիզմը կա, եղել է ու կլինի, ավելին` աշխարհի շատ երկրներում այն կարգավորված է սխեմատիկ ձևերով: Այն, որ Ադրբեջանն, իրոք, օգտվում է իր լոբբինգի մեծացման բոլոր ձևերից, դրա դեմ պայքարելն իմաստ չունի, հողմաղացների դեմ պայքարելն անիմաստ է, մենք, ավելի լավ է, մեր լոբբինգով զբաղվենք: Չեմ կարծում, թե ճիշտ է համեմատելը` ով շատ կամ քիչ քայլ արեց, ոչ, ուղղակի պիտի շարունակենք անել այն, ինչ մինչ այս անում էինք»,- ասաց Տողանյանը` հավելելով, որ մենք պետք է շարունակենք նաև սերտ համագործակցել միջազգային փորձագետների հետ: