Կարկտի դեմ պայքարի շրջանակներում քննակվեց ապահովագրական ընկերությունների ներգրավման հարցը

ՀՀ վարչապետ Կ. Կարապետյանի հանձնարարությամբ ստեղծվել է միջգերատեսչական աշխատանքային խումբ, որը պետք է ուսումնասիրի կարկտի դեմ պայքարի միջազգային առաջադեմ փորձը, ներկայացնի առաջարկներ դրա արդյունավետ տարբերակները Հայաստանում ներդնելու համար և մշակի նշված ոլորտի զարգացման նոր հայեցակարգ:

ՀՀ ԱԻ նախարարությունում տեղի ունեցավ միջգերատեսչական աշխատանքային խմբի առաջին նիստը` ՀՀ ԱԻ նախարար Դավիթ Տոնոյանի և ՀՀ գյուղատնտեսության նախարար Իգնատի Առաքելյանի գլխավորությամբ: Աշխատանքային խմբում ընդգրկված են ներկայացուցիչներ ՀՀ արտակարգ իրավիճակների, գյուղատնտեսության, բնապահպանության, տարածքային կառավարման և զարգացման նախարարություններից:

Նիստի ընթացքում քննարկվեցին հակակարկտային կայանքների տեղադրման արդյունավետ վայրեր ընտրելու խնդիրը, հակակարկտային ցանցեր կիրառելու տարբերակը, ապահովագրական ընկերությունների ներգրավման, առկա կայանների արդիականացման և այլ հարցեր: Մասնավորապես՝ պայմանավորվածություն ձեռքբերվեց հայտարարել միջազգային կազմակերպությունների կողմից կարկուտի դեմ պայքարի առավել արդյունավետ մեթոդների ուսումնասիրության և մշակման մրցույթ, միջոցառումներն իրականացնել ամենասեղմ ժամկետներում: