Քարոզարշավը բարեկիրթ ձևով տարեք. Սեյրան Օհանյան

Այսօր լրագրողների հետ զրույցում պաշտպանության նախկին նախարար, ՕՐՕ դաշինքի անդամ Սեյրան Օհանյանն անդրադարձավ երեկ Ջրառատ գյուղում տեղի ունեցած միջադեպին: Հիշեցնենք, որ երեկ Ջրառատի գյուղապետի ու ՕՐՕ-ի համակիրի միջև միջադեպ է եղել, որի ժամանակ գյուղապետը զենք է կիրառել:

Սեյրան Օհանյանն անընդունելի համարեց հանրահավաքներին մասնակցելու պատճառով իրենց համակիրներին վիրավորելը:

«Միջադեպի ժամանակ փորձել են զենք կիրառել մեր թիմակցի նկատմամբ: Կրակոց է եղել: Այդպես չի կարելի, ոստիկանություն էին տարել միջադեպի միայն մեկ կողմին: Բուն միջադեպի պատճառը փորձում են ներկայացնել, թե միջանձնային է, սակայն դա մեր հանրահավաքին մասնակցելու պատճառով նրանց վիրավորելն է: Իմ թիմակցին հայհոյել են, իսկ հայհոյողին  ի՞նչ են անում, պատժում են»,- ասաց նա:

Հարցին, թե ի՞նչ ուղերձ ունի միջադեպի հեղինակներին, Սեյրան Օհանյանը պատասխանեց. «Քարոզարշավը բարեկիրթ ձևով տարեք, օրենքներ մի' խախտեք, մեկդ մյուսին մի' վիրավորեք, քարոզարշավը մի' իջեցրեք բակային ասֆալտի մակարդակի: Մենք որևէ ուժի  ներկայացուցչի չենք վիրավորում»: