Ես խորհրդարան օրենսդրական նախաձեռնություն եմ մտցրել Սահմանադրության մեջ ուղղումներ կատարելու մասին. Մոլդովայի նախագահ

Մոլդովայի նախագահ Իգոր Դոդոնը խորհրդարան օրենսդրական նախաձեռնություն է մտցրել պետության ղեկավարին խորհրդարանի արձակման լրացուցիչ լիազորություններով օժտելու մասին, հայտնում է «ТАСС»-ը:

«Ես խորհրդարան օրենսդրական նախաձեռնություն եմ մտցրել Սահմանադրության մեջ ուղղումներ կատարելու մասին, որոնք ընդլայնում են նախագահի լիազորությունները և նրան օժտում խորհրդարանն արձակելու իրավունքով: Հուսով եմ, որ պատգամավորները կպաշտպանեն այս նախաձեռնությունը, որը համապատասխանում է երկրի քաղաքացիների մեծամասնության ցանկություններին, որոնք հանդես են գալիս վաղաժամկետ խորհրդարանական ընտրություններ անցկացնելու օգտին»,-ասել է Դոդոնը լրագրողներին:

Նրա խոսքով՝ օրինագիծը նախատեսում է հիմնական օրենքում ներառել ևս հինգ դեպք, երբ խորհրդարանը կարող է արձակվել պետության ղեկավարի կողմից:

«Եթե խորհրդարանը չպաշտպանի նախագահի նախաձեռնությունը, ապա ես հարկադրված կլինեմ դիմել ժողովրդին: Այս դեպքում բացառված չէ հանրաքվեի անցկացման հնարավորությունը. թող մեզ դատեն ընտրողները: Կա նաև ավելի արմատական տարբերակ, որը նախատեսում է անցում կառավարման նախագահական ձևի», - ընդգծել է Դոդոնը: