Լիազորված տնտեսական օպերատորները պետք է հաշվառվեն. վարչապետ

Այսօր կառավարության նիստում վարչապետ Կարեն Կարապետյանը հանձնարարական տվեց լիազորված տնտեսական օպերատորի վերաբերյալ: Այդ ինստիտուտը ներդրվել է նախանցյալ տարի, այն բիզնեսի տնտեսական գործունեության ու ակտիվության բարձրացման կարևորագույն գործիք կարող է հանդիսանալ:

Այն թույլ է տալիս օպերատորներին աշխատել պարզեցված մաքսային ընթացակարգերով, վճարումների կատարման առումով ստանալ բարենպաստ պայմաններ, մաքսային հսկողության ենթարկվել նախընտրած վայրում: Եվ չնայած այդ ինստիտուտի գործարկման համար անցյալ տարի մշակվել է իրավական հենք, սակայն մինչ այժմ ոչ մի լիազորված օպերատոր դեռ չի հաշվառվել:

«Այդ գործիքը պետք է ակտիվացնել: Հանձնարարում եմ ՊԵԿ-ին, ֆինանսների, տնտեսական զարգացման նախարարներին` համատեղ աշխատել և մեկամսյա ժամկետում վեր հանել ու ներկայացնել տնտեսական լիազոր օպերատորի կարգավիճակ շնորհելու գործընթացում առկա խոչընդոտները, զեկուցել, թե մի քանի ամիս անց քանի լիազորված օպերատոր է հաշվառվել»,- ասաց վարչապետը` հավելելով, որ երկու ամսվա ընթացքում պետք է նաև իրականացնել ակտիվ իրազեկում հանրության շրջանում: