Փայլանը հիշեցրել է Թուրքիայի իշխանություններին Զատկի տոնի ամսաթիվն ու կոչ արել այդ օրը հանրաքվե չանցկացնել

Թուրքիայի ընդդիմադիր Ժողովրդադեմոկրատական կուսակցության անդամ, խորհրդարանի հայազգի պատգամավոր Կարո Փայլանը Twitter- ի իր պաշտոնական էջում գրառում է կատարել, որտեղ հիշեցրել է Թուրքիայի բնակիչներին, որ այս տարի Հայ առաքելական եկեղեցու հետևորդները Սուրբ Հարության տոնը նշելու են ապրիլի 16-ին և կոչ է արել երկրի իշխանություններին սահմանադրական փոփոխությունների վերաբերյալ հանրաքվեի ամսաթվի շուրջ որոշում կայացնելուց առաջ հաշվի առնել այս փաստը:

«Այս տարի քրիստոնյա աշխարհը Զատկի տոնը նշելու է ապրիլի 16-ին: Այդ օրը չպետք է հանրաքվե անցկացվի», - գրել է Փայլանը:

Հիշեցնենք, որ հունվարի 21-ին Թուրքիայի խորհրդարանը ձայների մեծամասնությամբ հավանություն է տվել Սահմանադրությունում փոփոխությունների իրականացման փաթեթին, որն առաջարկում է անցում կատարել կառավարման նախագահական համակարգին: 18 հոդվածից բաղկացած օրենքի ընդունմանը կողմ է քվեարկել 339 պատգամավոր: Այնուհետ օրենքը կդրվի հանրաքվեի, ինչից հետո էլ կկայացվի վերջնական որոշում: