Ձևավորվում է ԲՍՓ բժիշկ-փորձագետների տվյալների բանկ

ՀՀ աշխատանքի և սոցիալական հարցերի նախարար Արտեմ Ասատրյանի հանձնարարականով բժշկասոցիալական փորձաքննության բարեփոխումների շրջանակներում կստեղծվի հաշմանդամություն ունեցող անձանց բժշկասոցիալական փորձաքննության բժիշկ-փորձագետների տվյալների բանկ, հայտնում են ՀՀ աշխատանքի և սոցիալական հարցերի նախարարության հասարակայնության հետ կապերի բաժնից:

Տվյալների բանկում գրանցվողը կընդգրկվի նշված ուղղությամբ որպես՝ բժիշկ-փորձագետ աշխատելու հնարավոր թեկնածուների ցանկում։ Համապատասխան մրցույթների շրջանակներում հնարավոր թեկնածությունը ամրագրելու դեպքում գրանցվածը կհրավիրվի հարցազրույցի։

Ընտրված և վերապատրաստման կարիք ունեցող թեկնածուների համար ՀՀ աշխատանքի և սոցիալական հարցերի նախարարության «Աշխատանքի և սոցիալական հետազոտությունների ազգային ինստիտուտ» ՊՈԱԿ-ում կամ այլ մասնագիտացված կառույցներում կկազմակերպվեն նաև որակավորման բարձրացման և նեղ պրոֆիլավորման դասընթացներ։