«Հուսով ենք՝ դասեր կքաղեն». Թուրքիայի ԱԳՆ-ն՝ Ցեղասպանության վերաբերյալ ընդունված որոշոման մասին

Թուրքիայի ԱԳ նախարարությունը հայտարարություն է տարածել Ֆրանսիայի Սահմանադրական խորհրդի կողմից Հայոց ցեղասպանության ժխտումը քրեականացնող օրենքի չեղարկման վերաբերյալ՝ դրանից «դասեր քաղելու» կոչեր ուղղելով:

Նախարարության պաշտոնական կայքում հրապարակված հայտարարության մեջ նշվում է, որ «ընդունված որոշումը իրավական կարևոր ձեռքբերում է՝ պատմական խնդիրների վերաբերյալ ժողովրդավարական քննարկումների, ներքաղաքական նկատառումներով արված ոչ օրինական սահմանափակումների տեսանկյունից»:

Հայտարարության համաձայն՝ այս որոշմամբ Ֆրանսիայի ՍԴ-ն ևս մեկ անգամ ցույց տվեց իր հավատարմությունը «ժողովրդավարության անքակտելի մասը համարվող խոսքի ազատության և օրենքի գերակայության սկզբունքներին»:

«Հույս ունենք, որ քաղաքական նպատակներով նման խնդիրները շահարկող շրջանակները այս որոշումից անհրաժեշտ դասեր կքաղեն»,- նշվել է հայտարարության մեջ:

Հիշեցնենք, որ Սահմանադրական խորհուրդը հակասահմանադրական է համարել մարդկության դեմ իրագործված հանցագործությունների ժխտման համար քրեական պատասխանատվություն սահմանելը` դա համարելով կատարված իրադարձությունների մասին կարծիք հայտնելու ազատությանը խոչընդոտում: Այդ որոշման շրջանակներում Հայոց ցեղասպանության ժխտումը ևս չի քրեականացվի: