«Երեկ երեկոյան մահացել է, մի ժամ առաջ նոր դիահերձարան ենք տարել` ձյան պատճառով»

Արագածոտնի մարզի Ծաղկաշեն համայնքում ձյան շերտի բարձրությունը 1 մետրից ավելի է: Ծաղկաշենի գյուղապետ Խալաթ Ոսկանյանը yerkir.am-ի հետ զրույցում նշեց, որ առավոտյան Ապարանի «Ճանշին»-ից եկել, մաքրել են, սակայն ձյունն այնքան առատ է գալիս, որ ճանապարհները կրկին դարձել են անանցանելի:

«Քամի էլ կա, մի խոսքով` կարգին բուք է: Երեկ համագյուղացիներից մեկը մահացել էր, և ձյան պատճառով չէինք կարողանում տանել դիահերձարան, որը 12 կմ է հեռու: Պատկերացրեք` մի ժամ առաջ ենք նոր տարել մարմինն այնտեղ: Հիմա բոլորն էլ աշխատում են` տղամարդիկ բահերով են փորձում գոնե մի քիչ թեթևացնել ձյան շերտը»,- ասաց Ոսկանյանը:

Նա տեղեկացրեց նաև, որ, բարեբախտաբար, հիվանդանոց դիմելու կարիք ոչ ոք չի ունեցել: «Հիմա էլ առատ ձյուն է տեղում, որ կարիք լինի, մի կերպ ենք հասցնելու»,- ասաց գյուղապետը: