Ժողովրդի ոգևորությունը նվազեցնելու փորձերն ամոթալի են ու սուտ. Թրամփ

ԱՄՆ նախագահ Դոնալդ Թրամփը և Սպիտակ տան մամուլի քարտուղար Շոն Սփայսերը քննադատել են ԶԼՄ-ներին երդմնակալության արարողության լուսաբանման համար, հայտնում է AFP գործակալությունը:

Թրամփի խոսքերով՝ Ազգային ճեմուղում իր ելույթի ժամանակ եղել է մոտ մեկուկես միլիոն մարդ: Որոշ ԶԼՄ-ներ հայտնել են, որ ներկաների թիվը զգալի քիչ է եղել՝ նախագահին մեղադրելով նրանում, որ նա «չի կարող հաշվել»:

«Նրանք (ԶԼՄ-ները) ցուցադրում էին գրեթե դատարկ դաշտը և ասել են, թե Թրամփն ուշադրություն չի գրավել»,- ասել է նա:

Սփայսերը Սպիտակ տանն իր առաջին ճեպազրույցում անդրադարձել է Թրամփի երդմնակալության ելույթի ներկաների թվին:

«Դա ամենամեծ լսարանն էր, որը ներկա է եղել երբևէ երդմնակալությանը»,- ասել է նա՝ լրագրողներին մեղադրելով «դիտավորյալ կեղծ հաղորդագրություններ» տարածելու մեջ:

«Ժողովրդի ոգևորությունը նվազեցնելու փորձերն ամոթալի են ու սուտ»,- ընդգծել է նա՝ հեռանալով սրահից ու լրագրողներին թույլ չտալով ավանդույթի համաձայն հարցեր տալ:
Թրամփի երդմնակալության արարողությունը տեղի է ունեցել Վաշինգտոնում հունվարի 20-ին: