Թուրքիայում պատրաստվում են պատիժ սահմանել Ցեղասպանությունը ճանաչողների համար

Թուրքիայում Հայոց ցեղասպանության ճանաչման դեմ պայքարող, այսպես կոչված, «Հայկական անհիմն պնդումների դեմ միավորում» կազմակերպությունն առաջարկել է օրինական պատիժ սահմանել Հայոց ցեղասպանությունը ճանաչողների համար: 

Ըստ Milliyet-ի՝ կազմակերպությունը Թուրքիայի մեջլիս ներկայացնելու նպատակով նախագիծ է մշակում: Միության նախագահ Գյոքսել Գյուլբեյը նշել է, որ հատկապես վերջին շրջանում ազգային փոքրամասնությունների մի շարք ներկայացույցիչներ հայտարարում են, թե օսմանյան ժամանակաշրջանում ցեղասպանություն է կատարվել, իսկ դա մուսուլման թուրք ժողովրդին ուղղված վիրավորանք է:

Գյուլբենը նաև անդրադարձել է Թուրքիայում հայ պատգամավոր Կարո Փայլանի ելույթին՝ նշելով, որ «ցեղասպանություն» բառի կիրառման համար նրան մեջլիսի առաջիկա 3 նիստերին մասնակցելուց զրկելն արդեն իսկ նախադեպ է ստեղծում իր առաջարկած օրինագծի համար: 

Նա տեղեկացրել է, որ իրենք այդ հարցով նաև  հանդիպումներ կունենան Էրդողանի «Արդարություն և զարգացում», Ժողովրդա-հանրապետական, ինչպես նաև «Ազգային շարժում» կուսակցությունների ներկայացուցիչների հետ: