Դեմիրթաշի լուսանկարն իր էջի գլխավոր նկար դարձրած թաղապետը հեռացվել է աշխատանքից

Ներկայիս Թուրքիայի տարածքում գտնվող հայկական Տիգրանակերտ (Դիարբեքիր) քաղաքի Բիսմիլ շրջանում երեք թաղապետեր հետացվել են աշխատանքից՝ «ահաբեկչական կազմակերպության» քարոզչություն իրականացնելու մեղադրանքով:

Ըստ Demokrathaber-ի՝ Էսենթեփեյի, Ալթընոքի և Սանայիի թաղապետեր Ալաաթթին Թեքինը, Մյուրսել Զորոօղլուն և Մեհմեդ Բայանդըրը կանչվել են ոստիկանություն՝ ցուցմունք տալու:

Բայընդըրին հարց է ուղղվել, թե ինչու է նրա ֆեյսբուքյան էջի գլխավոր լուսանկարը քրդամետ Ժողովուրդների դեմոկրատական կուսակցության՝ այժմ կալանքի տակ գտնվող համանախագահ Սելահաթթին Դեմիրթաշի լուսանկարը:

Թաղապետերի հարցաքննությունից հետո նրանց աշխատանքից ազատելու վերաբերյալ հայտարարության մեջ նահանգապետարանը պնդել է, որ նրանք իրականացրել են «ահաբեկչական քարոզչություն», այդ պատճառով էլ հեռացվել են իրենց զբաղեցրած պաշտոններից: