Ամենայն հավանականությամբ, Կարեն Կարապետյանը եւս կդառնա ՀՀԿ-ական. Շարմազանով

ԱԺ փոխխոսնակ Էդուարդ Շարմազնավն այսօր խորհրդարանում լրագրողներին ասաց, որ միայն ուրախ է, որ ՀՀ պաշտպանության նախարար Վիգեն Սարգսյանը որոշել է միանալ Հանրապետական կուսակցությանը: Նա վստահեցրեց, որ Վիգեն Սարգսյանի վրա որևէ ճնշում չի եղել, դա բացառապես Սարգսյանի որոշումն է:

Հարցին, թե Վիգեն Սարգսյանն արդեն համապատասխան դիմումը գրե՞լ է, Շարմազանովը պատասխանեց. «Դեռ երեկ այդպիսի դիմում չի եղել, իսկ այսօր տեղեկացանք, որ նա նման որոշում է կայացրել: Հավանաբար, մոտ օրերս կգրի: Անկեղծ ասած` մեզ համար շատ կարևոր է, որ մեր երկրի առանցքային քաղաքական դեմքերից մեկը նման որոշում է կայացրել` անդամակցել ՀՀԿ-ին»:

Պատասխանելով հարցին՝ չի՞ խանգարի այդ որոշումը Վիգեն Սարգսյանին, նա պատասխանեց. «Կապրենք կտեսնենք»:

Շարմազանովը դժվարացավ ասել, թե Կարեն Կարապետյա՞նն ինչ որոշում է կայացրել այդ առնչությամբ: Նա նշեց, որ, ամենայն հավանականությամբ, Կարապետյանը ևս կանդամագրվի ՀՀԿ-ին:

«Դա պարոն վարչապետի որոշումն է, բայց սահմանադրական բարեփոխումներից հետո արդեն քաղաքականության մեջ կուսակցական գործիչների դերակատարությունը պետք է բարձրանա: Եվ եթե մարդիկ ուզում են զբաղվել քաղաքականությամբ, պետք է լինեն այս կամ այն կուսակցության անդամ: Սա շատ կարևոր է նաև, որ մեր հարգարժան պաշտպանության նախարար Վիգեն Սարգսյանը նման որոշում է կայացրել: Նա պարկեշտ, ազնիվ, իսկ ամենակարևորը՝ հայրենասեր քաղաքական գործիչ է»,- եզրափակեց Շարմազանովը: