Պայթյունից վիրավորվել է հայերեն պաստառը հեռացնել պահանջած թուրք քաղաքապետը

Թուրքիայի Մարդին նահանգի Դերիք շրջանի քաղաքապետարանի շենքի մոտ հզոր պայթյուն է որոտացել:

Ըստ Demokrathaber-ի՝ դեպքի վայր են ժամանել մեծ թվով շտապօգնության մեքենաներ:

ANF-ի փոխանցմամբ՝ դեռևս անհայտ պատճառներով տեղի ունեցած պայթյունի հետևանքով վիրավորվածների թվում է քաղաքապետարանում որպես հսկիչ նշանակված` քաղաքապետ Մուհամմեդ Ֆաթիհ Սաֆիթուրքը:

«Դողան» լրատվական գործակալությունը հայտնում է նաև քաղաքապետի երկու թիկնապահների, ինչպես նաև երկու այլ քաղաքացիների վիրավոր լինելու մասին: Նրանց տեղափոխվել են հիվանդանոց:

Demokrathaber-ը հիշեցնում է, որ Սաֆիթուրքն այն քաղաքապետն է, ով պահանջել էր հեռացնել Դերիքի քաղաքապետարանի պատից կախված` հայերենով պաստառը:  Պաստառը հեռացնելուց հետո այնտեղ հայտնվել էր Թուրքիայի դրոշը: