Վարչապետն այլևս չի հասցնում, գերատեսչությունները պետք է օգնեն նրան

Այսօր կառավարության հերթական նիստում ՀՀ վարչապետ Կարեն Կարապետյանը բոլոր նախարարներին և գերատեսչություններին հանձնարարեց իրենց պաշտոնական կայքերում «ռևիզիա անել»։ «Թեժ գծերն աշխատեցրեք, պատասխանատուներին կոնկրետ նշեք, որովհետև իմ օգնականներն ու խորհրդականները այս մի քանի օրվա մեջ, բացի զանգերին պատասխանելուց և հանդիպելուց, ոչ մի բան չեն կարողանում անել։ Նրանք աշխատանքային ռեժիմից դուրս են եկել և չեն կարողանում ուրիշ այլ բանով զբաղվել, քան զանգերին, հաղորդագրություններին պատասխանելն ու հանդիպումներ կազմակերպելը»,- ասաց վարչապետը և նշեց, որ չի կարողանում նրանց ո'չ հանձնարարություն տալ, ո'չ նրանց հետ հանդիպել, խոսել։

Կարեն Կարապետյանը նշեց, որ մի քանի օրվա ընթացքում իր խորհրդականներն ու օգնականները պատասխանել են 2156 զանգի, ստացվել է 586 էլեկտրոնային հաղորդագրություն, հանդիպումների քանակը 100-ից անցել է: Ըստ նրա` եթե նախարարները բեռը չվերցնեն, ամբողջ ծանրությունը կընկնի վարչապետի օգնականների վրա, ինչը արդյունավետ չէ, քանի որ, միևնույն է, հարցադրումների հասցեատերերը նախարարություններն են ու գերատեսչությունները: