Թուրքիայում հայկական եկեղեցին և գերեզմանները դարձյալ հայտնվել են գանձ որոնողների թիրախում

Թուրքիայում «Հայ փոքրամասնության միության» նախագահ Ազիզ Դաղջըն տեղեկացրել է, որ թուրք գանձ որոնողների նոր թիրախը Բիթլիս նահանգի Մութքի շրջանի Քովանլը գյուղում գտնվող հայկական Սուրբ Մարիամ Աստվածածին եկեղեցին և հարակից հայկական գերեզմաններն են:

Ըստ Timeturk-ի՝ Դաղջըն ահազանգել է, որ եկեղեցու մոտ և գերեզմաններում 3 մետր խորությամբ հորատումներ են արվել: Նա տեղեկացրել է, որ Մուշում և Սասունում տեղի ունեցած միջադեպերից հետո միությունը դիմել էր դատախազություն, իսկ հիմա կանգնել են նույն խնդրի առաջ: Դաղջըն պատկան մարմիններին կոչ է արել համապատասխան միջոցներ ձեռնարկել նմանատիպ վանդալիզմը կասեցնելու համար:

«Պատմական վայրերը ավերելու և ոչնչացնելու փոխարեն պետք է դրանք վերանորոգենք և զբոսաշրջության կենտրոնի վերածենք»,-ասել է նա: