Բջջային հեռախոսի մասին հարցը կառավարության նիստում քննարկելը դուր չեկավ վարչապետին

ՀՀ արտաքին գործերի փոխնախարար Շավարշ Քոչարյանն այսօր կառավարության նիստում ներկայացրեց նախագիծ, որով առաջարկվում էր մեկ բջջային հեռախոս տրամադրել նախարարությանը` ԱԳ նախարարի առաջին տեղակալի նոր հաստիքով պայմանավորված:

Վարչապետ Կարեն Կարապետյանը, դիմելով կառավարության աշխատակազմի ղեկավար-նախարարին, հարցրեց. «Ի՞նչ կարելի է անել, որ այս կարգի որոշումները հանվեն օրակարգից»:

Վարչապետը հիշեցրեց իր հանձնարարականը` ապակենտրոնացնել որոշումների մեծ մասը:

Կառավարության աշխատակազմի ղեկավար-նախարար Դավիթ Հարությունյանը նշեց, որ այդ հանձնարարականի հետ կապված աշխատանքներ տարվում են, և անհրաժեշտ կլինի նախագահի համապատասխան հրամանագրերում որոշակի փոփոխություններ անել: