Գյումրիում քաղաքացին քվեարկել է ռուսական անձնագրով

Արդեն հայտնել ենք, որ այսօր հանրապետության մի շարք համայնքներում ընթանում են տեղական ինքնակառավարման մարմինների ընտրություններ:

Գյումրի քաղաքի 34/74 ընտրատեղամասում այս պահի դրությամբ իր քաղաքացիական պարտքն է կատարել հարյուրից ավելի ընտրող: Վերոնշյալ ընտրատեղամասի հանձնաժողովի նախագահ Անահիտ Գրիգորյանը Yerkir.am-ի հետ զրույցում ասաց, որ ընտրությունները մեկնարկել են և ընթանում են բնականոն, բացառությամբ՝ մեկ դեպքի` մեկ քաղաքացի քվեարկել է ռուսական անձնագրով:

«Հանձնաժողովի անդամը պարզապես չէր նկատել, որ ռուսական անձնագիր է: Մինչև իմացա, արդեն քվեարկել էր: Արձանագրել ենք»,- ասաց հնաձնաժողովի նախագահը:

Նշենք, որ վերոնշյալ ընտրատեղամասում է քվեարկելու նաև Գյումրիի գործող քաղաքապետ, քաղաքապետի թեկնածու Սամվել Բալասանյանը: