Վարչապետին մտահոգություններ են հասել` սննդի անվտանգության հետ կապված

Այսօր` կառավարության նիստից առաջ, վարչապետ Կարեն Կարապետյանը մի շարք կարևոր հանձնարարականներ տվեց: Նա նշեց, որ վերջին օրերին Սպառողների միության ներկայացուցիչների և գործարարների հետ հանդիպումների ժամանակ մտահոգություններ է լսել` սննդի անվտանգության հետ կապված:

Դիմելով գյուղատնտեսության նախարարին` վարչապետն ասաց. «Պարո\'ն Առաքելյան, Ձեզ` հանձնարարական: Հաշվի առնելով հնչեցված մտահոգությունները և դժգոհությունները` ուսումնասիրել այդ հարցը: Շեշտը դրեք այն հարցի վրա, թե սննդի ստուգման լաբորատորիան պե՞տք է լինի ՍԱՊԾ մեջ, թե՞ պետք է լինի անկախ»: Նա հանձնարարեց նախարարին` ներկայացնել առաջարկություններ:

Նշենք, որ այսօր մամուլը գրել էր ՍԱՊԾ-ից գործարարների դժգոհությունների մասին, որոնք հասել են նոր վարչապետին: Հնարավոր է` ՍԱՊԾ պետը պաշտոնանկ լինի: