Անիրատեսական բյուջեի նախագիծ ունենալը երկրի տակ ռումբ դնել է նշանակում. ֆինանսների նախարար

Այսօր` կառավարության նիստից հետո, ֆինանսների նորանշանակ նախարար Վարդան Արամյանը խոսեց լրագրողների հետ: Նա խնդրեց իրեն մի փոքր ժամանակ տալ, որպեսզի այդ ընթացքում հասցնի տիրապետել իր ոլորտի բոլոր խնդիրներին, հետո պատասխանել լրագրողներին հուզող հարցերին: Ի դեպ, նախարարը կարևորեց լրատվամիջոցների հետ հաղորդակցության ուղիների մշակումը:

Հարցին, թե ֆինանսների ոլորտում կա՞ կամ եղե՞լ է գողություն, քանի որ վարչապետն այսօր ասաց, որ գողությունը պետք է վերանա պետական համակարգում, նորանշանակ նախարարը նշեց. «Չեմ կարող ասել»:

Բյուջեի նախագծի մասին խոսելիս Արամյանը կարծիք հայտնեց, որ  բյուջեն այնպես պետք է կազմվի, որ հարկատուների գումարները օգտագործվեն խնայողաբար և նպատակային: Նա նշեց, որ  խնդրահարույց տնտեսության պարագայում անիրատեսական բյուջե գրելը  ոչ այլ ինչ է, եթե ոչ երկրի տակ ռումբ դնել, ուստի հանրությանը պետք է մանրամասն բացատրել, թե որ ծախսն ինչպես են պատկերացնում:

Այսօր վարչապետ Կարեն Կարապետյանը ֆինանսների նախարարությունում ներկայացրեց Վարդան Արամյանին` ասելով, որ նորովի պետք է նայել, թե ինչպես են ապահովելու  մակրոտնտեսական ցուցանիշները: «Գնումների մասով առաջարկություններ եմ սպասում, ունենք բավական բարդ ու խճճված համակարգ, և պետք է հասկանալ` ինչպես պետք է անենք, որ այդ համակարգերը արդյունավետ կառավարենք»,- ասաց վարչապետը: