Կառավարությունը նախատեսում է առևտրական կցորդ ունենալ Չինաստանում

Կառավարության վաղվա նիստի օրակարգում էկոնոմիկայի նախարարությունը ներառել է որոշում`  Չինաստանի Ժողովրդական Հանրապետությունում ստեղծել  Հայաստանի Հանրապետության առևտրական կցորդի հաստիք (նստավայրը՝ ք. Պեկին):

Որոշման նախագիծը մշակվել է Հայաստանի և Չինաստանի միջև գործարար նախաձեռնությունների ակտիվացման և առևտրատնտեսական համագործակցության ընդլայնման նպատակով:

Հայաստանի Հանրապետության Նախագահի 2015 թվականի մարտի 24-28-ը Չինաստանի Ժողովրդական Հանրապետություն կատարած պետական այցի ընթացքում պայմանավորվածություններ են ձեռք բերվել ընդլայնել և ամրապնդել հայ-չինական փոխշահավետ առևտրատնտեսական համագործակցությունը և բարենպաստ պայմաններ ստեղծել ապրանքների, ծառայությունների, տեխնոլոգիաների և կապիտալի ներմուծման համար։

Այս համատեքստում Չինաստանի Ժողովրդական Հանրապետությունում Հայաստանի Հանրապետության առևտրական կցորդի հաստիքի ստեղծումը թույլ կտա առավել արդյունավետ ներկայացնելՀայաստանի Հանրապետության տնտեսական շահերը առևտրին և տնտեսական համագործակցության այլ ձևերին առնչվող բոլոր ոլորտներում, կդյուրացնի հայկական և չինական տնտեսվարող սուբյեկտների կողմից առևտրական, տնտեսական և գիտատեխնիկական համագործակցության բնագավառում գործարքների իրականացումը և կօժանդակի միմյանց միջև կապերի ստեղծմանը: