Պավլիկ Մանուկյանին տեղափոխել են քաղաքացիական հիվանդանոց

Այսօր «Էրեբունի» ԲԿ-ում կվիրահատեն «Սասնա ծռեր» խմբի անդամ, ներկայումս կալանքի տակ գտնվող Պավլիկ Մանուկյանին: Այս մասին Yerkir.am-ին հայտնեց Մանուկյանի պաշտպան Հարություն Բաղդասարյանը:

Մանուկյանին «Դատապարտյալների հիվանդանոց» ՔԿՀ-ում ոտքի պլաստիկ վիրահատության էին ենթարկել, իսկ «Էրեբունի»-ում նա կենթարկվի ոսկրի վիրահատության:

Նշենք, որ նրա որդին՝ Արամ Մանուկյանը, ով նույնպես «Սասնա ծռեր»-ից է ու կալանքի տակ, երկու օր առաջ է դուրս գրվել «Էրեբունի» ԲԿ-ից և տեղափոխվել «Դատապարտյալների հիվանդանոց» ՔԿՀ:

Արամ Մանուկյանը և նրա հայրը՝  Պավլիկ Մանուկյանը, ոտքերի հատվածում հրազենային վիրավորում էին ստացել ՊՊԾ գնդում տեղի ունեցած փոխհրաձգության ժամանակ: Պավլիկ Մանուկյանի վերջին վիրահատությունը կատարվել է օգոստոսի 19-ին «Դատապարտյալների հիվանդանոց» ՔԿՀ-ում: