Ուսումնական փուլի մեկնարկ` Արցախի պաշտպանության բանակում

Օգոստոսի 16-ին պաշտպանության բանակում մեկնարկել է 2016թ. բանակային ուսումնական տարվա երկրորդ կիսամյակը:

Մասնակցելով արեւելյան ուղղությամբ տեղակայված զորամասերից մեկում ամառային ուսումնական փուլի մեկնարկին նվիրված միջոցառումներին՝ ԼՂՀ ՊՆ, ՊԲ հրամանատար Լեւոն Մնացականյանը շնորհավորել է զորամասի անձնակազմին, կարեւորել նոր գիտելիքների ու հմտությունների ձեռք բերումը՝ հայրենյաց պաշտպանի սրբազան առաքելությունը պատվով կատարելու եւ երկրի սահմաններն անառիկ պահելու առումով:

Այնուհետեւ զորամասի հրամանատարի ուղեկցությամբ հետեւելով մեկնարկած մարտավարաշարային պարապմունքների ընթացքին՝ բանակի հրամանատարը դրանք մեթոդապես ճիշտ կազմակերպելու, ինչպես նաեւ նկատված թերացումներն ու բացթողումները վերացնելու նպատակով տվել է կոնկրետ ցուցումներ ու հանձնարարականներ՝ մասնավորապես ուշադրություն դարձնելով մարտական հերթապահության իրականացման հետ անմիջականորեն կապված հարցերին:

Նոր ուսումնականի մեկնարկի կապակցությամբ ՊԲ բոլոր զորամասերում եւ ստորաբաժանումներում կազմակերպվել են հանդիսավոր միտինգներ, որոնց մասնակցում էին բանակի հրամանատարական կազմն ու բարձրաստիճան սպաներ: