Կացնահարված հայրն ու աղջիկը հիվանդանոց են տեղափոխվել գանգուղեղային վնասվածքներով

Տեղեկացրել էինք, որ այսօր դաժան սպանություն է տեղի ունեցել Երևանում: Փեսան կացնով սպանել է զոքանչին, իսկ կինն ու աներն էլ վնասվածքներով տեղափոխվել են հիվանդանոց:

Yerkir.am-ին «Էրեբունի» հիվանդանոցի հասարակայնության հետ կապերի բաժնի պատասխանատու Շուշան Հունանյանը հայտնեց, որ այսօր հիվանդանոց են տեղափոխվել 37-ամյա Թագուհի Մանսուրյանը և 62-ամյա Վաչագան Մանսուրյանը:

«Նրանք հիվանդանոց են տեղափոխվել գանգուղեղային վնասվածքներով, մարմնի վրա նույնպես կային վնասվածքներ: Երկուսն էլ վիրահատվել են: Թագուհի Մանսուրյանը շնչում է  արհեստական շնչառության սարքի միջոցով, իսկ հայրը` ինքնուրույն: Երկուսն էլ գտնվում են վերակենդանացման բաժանմունքում»,- ասաց Հունանյանը:

Նա տեղեկացրեց նաև, որ բժիշկները հոր և աղջկա վիճակը գնահատում են կայուն ծանր: