ԼՂՀ իշխանությունները պետք է հասկանան, որ իրենց շնչի վրա են նստած. Թևան Պողոսյան

ՀՀ ԱԺ պատգամավոր Թևան Պողոսյանի կարծիքով` ԼՂՀ ԱԺ պատգամավոր Հայկ Խանումյանի ծեծի դեպքը կհաղթահարվի, եթե քննությունը թափանցիկ ընթանա: Այս մասին նա ասաց լրագրողների հետ զրույցում:

«Ունենք գործընթաց, Արցախի նախագահն է արձագանքել, ոստիկանությունն է արձագանքել: Արցախում կա նոր օմբուդսմեն, և նա նոր մոտեցումներ է ցուցաբերում: Ցավում եմ դեպքի համար, բայց եթե իսկապես մեղավորները պատժվեն, կհամարենք, որ մեկ քայլ ավելի ենք մոտեցել ժողովրդավարությունը»,- ասաց նա՝ հավելելով, որ լրատվամիջոցները և պատկան մարմինները պետք է անպայման հետևեն, որ ամենօրյա, պատասխանատու գործողություններ լինեն:

«Իշխանությունները պետք է հասկանան, որ իրենց շնչի վրա են նստած, և հետևեն, որ արժանիորեն պատժվեն մեղավորները»,- ասաց պատգամավորը:

Մյուս բանախոս Միքայել Մելքումյանն էլ ընդգծեց, որ, այս դեպքի հետ կապված, պետք է անպայման գնահատականներ տրվեն: «Պետք է գնահատականներ տրվեն և գործողություններ արվեն: Ճիշտ է` դա Արցախի ներքին գործն է, բայց մենք միասնական ժողովուրդ ենք և չենք կարող գնահատական չտալ: Չպետք է թույլ տանք, որ հակառակորդն արձանագրի, որ Արցախը ժողովրդավարական խնդիր ունի»,- ասաց նա: