Գազի և էլեկտրաէներգիայի սակագների նվազումը դրական ազդեցություն կունենա տնտեսության վրա. Արծվիկ Մինասյան

Գազի և էլեկտրաէներգիայի սակագների հավանական նվազումը դրական ազդեցություն կունենա տնտեսության վրա. այսօր լրագրողներին ասաց էկոնոմիկայի նախարար Արծվիկ Մինասյանը:

Նրա խոսքով՝ այս պահին խնդիր է դրված, որ սակագների իջեցման հիմնական մասն ուղղվի տնտեսության այն հատվածներին, որոնք ավելի մեծ արդյունք կտան, որոնց աշխատանքի արդյունքում ավելի շատ զբաղված քաղաքացիներ կունենանք, ավելի շատ թողարկվող արտադրանք և ավելի ցածր ինքնարժեք:

«Մենք հիմա փորձում ենք այնպես անել, որ կարողանանք հավասարապես օգտակար լինել բոլորին՝ քաղաքացիներից սկսած, ձեռնարկություներով վերջացրած»,- ասաց նա՝ հավելելով, որ էլեկտրաէներգիայի ու գազի սակագնի նվազումը կարող է օգտակար լիներ հատկապես թիրախային այն ձեռնարկություններին, որտեղ մեծ կշիռ է կազմում գազը կամ գազի բազայի վրա հիմնված էներգիայի արտադրումը: