Նախարարության և «Հայաստան Արցախ» հիմնադրամի համատեղ աշխատանքին վերաբերող պայմանավորվածություններ են ձեռք բերվել

«Հայաստան Արցախ» հիմնադրամի նախագահ Հարութ Սասունյանի հետ հանդիպման ընթացքում քննարկվեցին մարդասիրական օգնության ճանապարհով Հայաստանի Հանրապետության և Արցախի առողջապահական համակարգերին դեղերով և բժշկական պարագաներով ապահովելու գործընթացի կանոնակարգմանը վերաբերող հարցեր։

 Հարութ Սասունյանը ՀՀ առողջապահության նախարար Արմեն Մուրադյանին ներկայացրեց, որ ղարաբաղաադրբեջանական քառօրյա պատերազմի ընթացքում իրենց կազմակերպությունը մարդասիրական օգնության մեծաթիվ առաջարկներ է ստացել։ Մասնավորապես, մեծածավալ օգնություն են տրամադրել հիմնադրամի վաղեմի գործընկերներից ամերիկյան CMMB (Catholic Medical Mission Board), ինչպես նաև AmeriCares և Direct Relief Inernational կազմակերպությունները։

Պայմանավորվածություններ ձեռք բերվեցին նախարարության և «Հայաստան Արցախ» հիմնադրամի հետագա համատեղ աշխատանքն առավել արդյունավետ դարձնելու ուղղությամբ։ Հիմնադրամի նախագահը շեշտեց, որ վերջին շրջանում նախարարության հետ համագործակցությունը առավել արդյունավետ և նպատակային է դարձել։

Արմեն Մուրադյանը ներկայացրեց Լեռնային Ղարաբաղի հակամարտության գոտում մարտական գործողությունների հետևանքով ստեղծված վիճակում առաջին իսկ օրից ՀՀ առողջապահության նախարարության համակարգված աշխատանքները` վիրավորներին բժշկական օգնությությունն արագ և արդյունավետ կազմակերպելու նպատակով։

Ի դեպ, CMMB կազմակերպության ներկայացուցիչներն այս օրերին Հայաստանում են։ Նրանք կծանոթանան Հայաստանի առողջապահական համակարգի վերջին զարգացումներին, նոր մարտահրավերներին, ինչպես նաև կհստակեցնեն իրենց կողմից տրամադրվող օգնության հետագա ուղղվածությունը:

Առողջապահության նախարարություն