ԱՄՆ Հավայի նահանգի Ներկայացուցիչների պալատը ճանաչել է Արցախի անկախությունը

Միացյալ Նահանգներում Հայաստանի դեսպանության ֆեյսբուքյան էջը տեղեկացնում է, որ ԱՄՆ Հավայի նահանգի Ներկայացուցիչների պալատը միաձայն բանաձև է ընդունել՝ ճանաչելով Լեռնային Ղարաբաղի Հանրապետության անկախությունը:

Այդ մասին տեղեկացնող հայտարարության մեջ ասվում է. «Հենց նոր տեղեկություն ենք ստացել Հոնոլուլուի մեր ընկերներից, որը հաստատում է, որ այսօր Հավայի նահանգի Ներկայացուցիչների պալատը միաձայն բանաձև է ընդունել՝ ճանաչելով Լեռնային Ղարաբաղի Հանրապետության անկախությունը:

Բանաձևում համերաշխություն է հայտնվում Լեռնային Ղարաբաղի ժողովրդին՝ կոչ անելով միջազգային հանրությանը՝ ճանաչել հանրապետությունը որպես ազատ, անկախ և ինքնիշխան պետություն։

Պալատը Միացյալ Նահանգների նախագահին և Կոնգրեսի Սենատի և Ներկայացուցիչների պալատի մեծամասնության առաջնորդներին կփոխանցի փաստաթղթի վավերացված պատճենը:

Այսպիսով`  Հավային դարձավ յոթերորդ նահանգը, որը ճանաչում է Լեռնային Ղարաբաղի անկախությունը՝ Ռոդ Այլենդի, Մասաչուսեթսի, Լուիզիանայի, Մեյնի, Կալիֆոռնիայի և Ջորջիայի հետ միասին»:

Լուսանկարները՝ ԱՄՆ-ում ՀՀ դեսպանատան ֆեյսբուքյան էջից