Երևանում Ռուս-հայկական մարդասիրական արձագանքման կենտրոն կբացվի

ՌԴ արտակարգ իրավիճակների նախարարության ղեկավար Վլադիմիր Պուչկովը ժամանելու է Երևան, որտեղ կբացվի Ռուս-հայկական մարդասիրական արձագանքման կենտրոն: Այդ մասին հայտնում է  ТАСС-ը՝ նախարարության մամուլի ծառայությանը հղումով:

Բացման հանդիսավոր արարողությանը կմասնակցեն նաև Հայաստանի Հանրապետության նախագահ Սերժ Սարգսյանը և արտակարգ իրավիճակների նախարար Արմեն Երիցյանը:

Նշվում է, որ կենտրոնը հիմնվելու է 2015-ի մայիսի 19-ի միջկառավարական համաձայնագրի շրջանակում: Հիմնական նպատակներից է որոնողա-փրկարարական գործողությունների անցկացումը` արտակարգ իրավիճակների չեզոքացման համար, որոնք առավել բնորոշ են լեռնային շրջաններին և պայմանավորված են երկրաշարժերով, սողանքներով, ձնահյուսերով: