Բրիտանացի գիտնականի արտաքսումը Թուրքիայից ծայրաստիճան ամոթալի է ԵՄ ղեկավարների համար. Independent

Բրիտանական Independent թերթն անդրադարձել է Թուրքիայում քրդերի օգտին քարոզչություն իրականացնելու մեջ մեղադրվող բրիտանացի գիտնական Քրիս Ստեֆենսոնի ձերբակալությանն ու երկրից արտաքսմանը:

«Այս դեպքը ծայրաստիճան ամոթալի է փախստականների ճգնաժամի լուծման համար Թուրքիայի հետ սկզբունքային համաձայնության հարցը քննարկող` ԵՄ ղեկավարների համար»,- գրել է թերթը՝ նշելով, որ արդեն 25 տարի Թուրքիայում ապրող գիտնականի կինն ու աղջիկը նրա արտաքսումը «սարսափելի և սխալ քայլ» են որակում:

Ըստ Independent-ի՝ օրեցօր ավելանում են Թուրքիայում մարդու իրավունքների նկատմամբ մտահոգությունները:

Թերթը հիշեցրել է նաև երեկ նախագահ Ռեջեփ Թայիփ Էրդողանի՝ «ահաբեկչություն և ահաբեկիչ» բառերի սահմանումների մասին` մեջլիսում հայտարարությունը, թե «պետք է վերանայել այդ բառերի սահմանումները և շտապ փոխել քրեական օրենսգիրքը»: