Սխալ ծախսեր իրականացրած պատասխանատուին պետք է պատասխանատվության ենթարկել. Հովիկ Աբրահամյան

Այսօր կառավարության նիստում ֆինանսների նախարար Գագիկ Խաչատրյանը ներկայացրեց որոշում, որով առաջարկվում է «Շուկայական հնարավորություն ֆերմերներին»  ծրագրի շրջանակներում ստանձնած պարտավորությունները կատարելու նպատակով Գյուղական տարածքների զարգացման հիմնադրամին պետական բյուջեից հատկացնել 346 հազար դոլարին համարժեք դրամ` մինչև 2016թ. դեկտեմբեր մարման ժամկետով:

Վարչապետը դիմեց կառավարության աշխատակազմի ղեկավար-նախարար Դավիթ Հարությունյանին` հանձնարարելով հետևություններ անել` այս հարցի հետ կապված:

«Առաջարկում եմ պատասխանատուին, հիմա ում պատճառով սխալ ծախսեր են իրականացվել, պատասխանատվության ենթարկել` օրենքի շրջանակներում: Հանձնարարում եմ այս հարցով զբաղվել, որովհետև հիմա մենք փող ենք տալիս պատասխանատուի սխալների համար: Ինչո՞ւ է նա խախտել միջազգային պայմանագրի պայմանները: Պետք է հետևողական լինենք նման դեպքերի համար»,- ասաց Հովիկ Աբրահամյանը: