ԲՀԿ-ն գոհ է ապագա ՄԻՊ-ի հետ հանդիպումից

Այսօր ՄԻՊ պաշտոնի թեկնածու Արման Թաթոյանը աշխատանքային հանդիպում ունեցավ ԱԺ ԲՀԿ խմբակցության հետ:

Հիշեցնենք, որ երեկ նա հանդիպել էր ՀՀԿ և ՀՅԴ խմբակցությունների հետ:

ԲՀԿ խոսնակ Վահան Բաբայանը լրագրողներին հայտնեց, որ հանդիպման ընթացքում տարբեր հարցադրումներ եղան, քննարկումներ, իսկ թե ինչպե՞ս կքվեարկեն, դեռ վերջնական որոշում չունեն:

«Այսօր տեղի է ունեցել աշխատանքային հանդիպում, որին մասնակցել են խմբակցության պատգամավորները: Խմբակցությունը լսեց ՄԻՊ թեկնածուին, ակտիվ քննարկում եղավ, տարբեր հարցեր բարձրացվեցին, որոնք վերաբերում են մարդու իրավունքներին, ազատություններին»,- ասաց Վահան Բաբայանը:

ԲՀԿ-ական պատգամավորի խոսքով` այս պահին որևէ դիրքորոշում հայտնել չեն կարող, առաջիկայում սպասվում է նաև խմբակցության նիստ, որի ընթացքում կորոշվի` ինչպես քվեարկել:

Հարցին, թե արդյո՞ք հանդիպման ընթացքում ԲՀԿ-ն ստացավ իրեն հուզող հարցերի պատասխանները, Վահան Բաբայանը պատասխանեց. «Պարոն Թաթոյանը մասնագիտական բարձր կարողություններ ունեցող անձնավորություն է, և իհարկե, մեր տարատեսակ հարցերին կարողանում էր պատասխանել»: