ՀՀ ԱԺ պատվիրակությունը` ԼՂՀ ԱԺ-ում

Փետրվարի 11-ին ԼՂՀ Ազգային ժողովի նախագահ Աշոտ Ղուլյանն ընդունել է ՀՀ ԱԺ նախագահ Գալուստ Սահակյանին և նրա հետ Ստեփանակերտ ժամանած պատվիրակությանը: Այս մասին տեղեկացնում է ԼՂՀ ԱԺ մամուլի ծառայությունը։

Ողջունելով հյուրերին՝ Աշոտ Ղուլյանը գոհունակություն է հայտնել ԼՂՀ և ՀՀ օրենսդիր մարմինների միջև համագործակցության ներկայիս մակարդակից՝ բարձր գնահատելով Հայաստանի խորհրդարանի ղեկավարի ներդրումը այդ գործում: ԼՂՀ ԱԺ նախագահը ընդգծել է Հայաստանի խորհրդարանի իրենց գործընկերների շահագրգիռ վերաբերմունքն Արցախին առնչվող հարցերում և առաջարկել համագործակցության նոր ուղղություններ:

 Շնորհակալություն հայտնելով ջերմ ընդունելության համար՝ Գալուստ Սահակյանը կարևորել է միջխորհրդարանական կապերի ամրապնդումը և նոր գործիքների ու ձևաչափերի կիրառման անհրաժեշտությունը:

 ՀՀ խորհրդարանի ղեկավարն անդրադարձել է նաև առաջնագծում տիրող իրավիճակին,  մասնավորապես հրադադարի հաճախակի խախտումներին:

 Այնուհետև հանդիպումը շարունակվել է ընդլայնված կազմով՝ Ազգային ժողովի փոքր դահլիճում, որին մասնակցել են միջխորհրդարանական հանձնաժողովի անդամները, պատգամավորներ:

 Հայկական երկու հանրապետությունների օրենսդիրները քննարկել են օրենսդրական աշխատանքներում փորձի փոխանակման, տարածաշրջանային զարգացումներին վերաբերող հարցերի լայն շրջանակ: Մտքերի փոխանակության արդյունքում առանձնացվել է հրատապ հարցերի ցանկ, որը նախատեսվում է ներառել ՀՀ-ԼՂՀ միջխորհրադարանական հանձնաժողովի առաջիկա նիստի օրակարգում:

Աշոտ Ղուլյանը և Գալուստ Սահակյանը հանդիպման արդյունքներն ամփոփել են  համատեղ մամուլի ասուլիսում: