Կարո Փայլանը Թուրքիայի խորհրդարանում պատմել է հայ լինելու համար խտրականության ենթարկվելու մասին

Թուրքիայում քրդամետ Ժողովուրդների դեմոկրատական կուսակցության` Կ.Պոլսից պատգամավոր Կարո Փայլանը խորհրդարանում առաջարկել է նույնականացման քարտերից հեռացնել կրոնական պատկանելության և ազգության մասին նշումները:

Ըստ Demokrathaber-ի` Փայլանը նշել է, որ դավանանքի և ազգության մասին նշումները խտրականություն են դնում՝ իր հետ կատարված դեպքերից մեկն օրինակ բերելով:

«Մանկուց ի վեր, երբ այցելել եմ պետական հաստատություն, նույն խնդրի առաջ եմ կանգնել: Նայում են՝ Կարո, իրենց անծանոթ անուն, շրջում են քարտը ու տեսնում են, որ քրիստոնյա է: Մի օրում լուծելի հարցը տևում է 10 օր: Բազմիցս խտրականության առաջ եմ կանգնել»,- պատմել է պատգամավորը: