Դավութօղլուի ակնարկից հետո թուրքական թերթը հրապարակավ ներողություն է խնդրել Արա Գյուլերից

Թուրքական Cumhuriyet թերթը ներողություն է խնդրել պոլսեցի հայտնի ֆոտոլրագրող Արա Գյուլերից՝ Ռեջեփ Թայիփ Էրդողանին և նրա ընտանիքին լուսանկարելու համար նրան քննադատելու համար:

Ըստ Demokrathaber-ի՝ կայքը նշել էր, որ Արա Գյուլերն ինքն է կապ հաստատել Էրդողանի հետ և նրան լուսանկարելու ցանկություն հայտնել, ինչն էլ Գյուլերի հասցեին հեգնական լուրեր հրապարակելու պատճառ էր հանդիսացել:

Կայքը Արա Գյուլերի մասին մի նոր լուր է հրապարակել, որում հրապարակավ ներողություն է խնդրել մեծ վարպետից՝ նշելով, որ «Էրդողանին լուսանկարելը, անշուշտ, սովորական երևույթ է»:

«Մենք մեր թույլ տված սխալի համար ներողություն ենք խնդրում»,- գրել է թերթը:

Հիշեցնենք, որ Թուրքիայի վարչապետ Ահմեդ Դավութօղլուն ևս անուղղակիորեն անդրադարձել էր թերթի հրապարակմանը` նշելով, որ Արա Գյուլերին դատապարտելու փորձեր են եղել: