ՀԱԿ-ի ստորագրահավաքին միացած պատգամավորների թիվը չորսն է

ԱԺ ՕԵԿ խմբակցության պատգամավոր Հովհաննես Մարգարյանը քիչ առաջ խորհրդարանում լրագրողներին տեղեկացրեց, որ իրենց խմբակցությունից երկու պատգամավոր են ստորագրել ՀԱԿ խմբակցության՝ Սահմանադրական դատարանին ուղղված՝ սահմանադրական բարեփոխումների հանրաքվեն անվավեր ճանաչելու դիմումի տակ:

«Ես քիչ առաջ տեղեկացա, որ մեր գործընկերներն ընդմիջման ժամին մոտեցել են, ու ֆրակցիայում եղել է երկու պատգամավոր, երկուսն էլ ստորագրել են այդ դիմումի տակ»,- ասաց Մարգարյանը` տեղեկացնելով, որ ստորագրել են Հեղինե Բիշարյանը և Լևոն Դոխոլյանը:

Հիշեցնենք, որ ԱԺ ՀԱԿ խմբակցությունը նախաձեռնել է ստորագրահավաք, որպեսզի Սահմանադրական դատարանում վիճարկի դեկտեմբերի 6-ին տեղի ունեցած հանրաքվեի արդյունքները: ՀԱԿ-ին գործընթացը սկսելու համար անհրաժեշտ է 27 պատգամավորի ստորագրություն: Առայժմ հայտնի է, որ, ՕԵԿ-ական երկու պատգամավորներից բացի, ստորագրահավաքին միանալու պատրաստակամություն են հայտնել պատգամավորներ Թևան Պողոսյանը, Էդմոն Մարուքյանը, իսկ Խաչատուր Քոքոբելյանն էլ հայտարարել է, որ դեռևս ժամանակ ունի և կմտածի: