Ընտրախախտումների մասին որոշ ահազանգերն անանուն են եղել

Սահմանադրական բարեփոխումների օրը ընտրախախտումների վերաբերյալ ահազանգեր եղել են նաև գլխավոր դատախազի ընդունարանում: Այս մասին լրագրողներին հայտնեց գլխավոր դատախազ Գևորգ Կոստանյանը` նշելով, որ զանգերը հիմնականում անանուն են եղել:

Դատախազի խոսքով` ընտրախախտումները բացահայտելու համար դատախազությունը կենտրոնացրել է բոլոր ռեսուրսները: Նա նշեց, որ ԶԼՄ-ների ցանկացած հաղորդման ընթացք է տրվել: Ըստ դատախազության տվյալների` ընտրությունների օրը եղել է 461 ահազանգ, որոնցից 14-ով քրեական գործ է հարուցվել, իսկ 189-ի նյութերով որոշում է կայացվել քրեական գործերի հարուցումը մերժելու մասին:

«Ահազանգերի առկայությունը դեռևս չի նշանակում հանցագործության մասին հաղորդում: Հանցագործության մասին հաղորդումն այն առիթն է, որի հիման վրա պետք է գործ հարուցվի»,- ասաց Կոստանյանը:

Հարցին` արդյո՞ք Հովիկ Աբրահամյանի այն հայտարարությունը, որ ընտրախախտումների վերաբերյալ շատ տեսանյութեր մոնտաժված են եղել, ուղղորդում չէ դատախազությանը, գլխավոր դատախազը պատասխանեց. «Գլխավոր դատախազությանը որևէ մեկը չի կարող ուղղորդել: Ես, անկեղծ ասած, չեմ լսել նման հայտարարություն և չեմ կարծում` նման հայտարարություն եղած լինի»,- ասաց նա:

Կոստանյանը միաժամանակ նշեց, որ տեսանյութերով զուգորդված նյութերն ավելի օպերատիվ արձագանքման հնարավորություն ունեն: